Aus de gude alde Zeit: DIE REITSCHUL

Nachrichtenblatt der Gemeinde Altrip

Nachrichtenblatt der Gemeinde Altrip | Donnerstag, den 20. September 1962 | 3. Jahrgang - Nummer 38 


DIE REITSCHUL

AUS DE GUDE ALDE ZEIT

 
So um die Johrhunnerdwend
hot mer im Dorf bloß e Fescht gekennt.
Des war die Kerwe, un war die ball do,
ach, was waren mer Kinner froh. 
  

Wann's dann ghase hot, die Reitschul kimmt,
war unnerwegs e jedes Kind.
Bis zum Hochzichloch sinn mer entgegegeeilt
unn henn se uff de Kercheplatz begleit. 
  

Do sinn mer vun frieh bis owends gsesse,
henn sogar des Mittagesse vergesse.
Manche Mudder hot owends gsucht ehrn Bu,
der an de Reitschul hot gschlofe in sießer Ruh.
  

Awer de schenschte Aacheblick is kumme,
wann de Reitschulmann sundags hot s ’ Dach abgenumme.
Do is se gschdanne in ere glitzernde Pracht,
wie hot uns do s’Herz im Leib gelacht. 
  

Daß se in Schwung is kumme, henn Buwe gedrickt.
die henn umesunscht fahre dirfe, e Stick.
Oft war se so voll, daß se sich hot geboche,
emol sogar is se zsammegebroche. 
  

Do hot sich der Mann e anneri agschafft,
angedriwe vun Pferdekraft.
Mer Kinner henn efters e Freidur ghatt,
weil mer uffgsprunge sinn während de Fahrt. 
  

Doch als dann kumme die elekdrische Motore,
hot se viel vun ehrm Reiz verlöre.
Im Nu war se jetzt an uns vorbei,
aus war’s mit de Schwarzfahrerei. 
  

Die Kinner vun heit, die dauere am, 
die wissenix vun dem scheene Reitschuldraam.
Die kenne kee Drillerchaise unn Geil,
bloß Auto-Scooter mit wieschdem Geheil. 
  

Do dra sieht mer, daß alles vergeht,
wie die Reitschul vum Winde verweht.

 (Autor: unbekannt)
Wir benutzen Cookies
Diese Website nutzt Cookies, um Ihnen die bestmögliche Nutzererfahrung auf unserer Website bieten zu können.